إياك يا صاحبي تصاحب صاحب الكيف..رفيق الحشيشة و البرشام
الكيف للي يصاحبه يمسح دماغ صاحبة،ويخليه زيي البلياتشو يبدل كل يوم وش على حسب الزمان و المكان
مرة وش الولي, مرة وش الثورجي, مرة وش الحنين أبوقلب طيب...لكن ما بيليقش علية غير وش الشمام
واطي مع أهله،غدار مع صاحبه،ماهو الكيف يا صاحبي بيخلي صاحبه مسخ ومالوش آمان
كدبه قليل،يدوبك كل أما يفتح بقه
إياك يا صاحبي تصاحب الشمام رفيق الحشيشة و البرشام،ولو كان من نسل النبي عليه السلام

دمتم بود

احترس نظام مبارك يدمر الصحة و يسبب الوفاة
الاثار المدمرة للنظام تصيب المعارضين وغير المعارضين

نظام مبارك لفترة طويلة يؤثر على العلاقة الزوجية

على الفضائيات وفي الشوارع و أثناء الكلام مع الناس تحس أن الرأي العام منقسم "بمعنى" ناس مع استمرار الاحتجاجات بميدان التحرير و ناس ضد استمرار اعتصام التحرير ،وتلاقي الناس اللي ضد الاحتجاج لما تتكلم معها تقولك كلام يدل على حسن نية من نوعية أن مبارك دة رمز لمصر و دة الأب ودة بطل من أبطال أكتوبر وكلام من هذا النوع
الأخوة بقى اللي هما تبع القلة المندسة"المحتجين"في الغالب لو وقفت على دماغك أدامه مش هيغير مطلبه الأساسي أن مبارك لازم يمشي وتقعد تجيله يمين و شمال و دة الأب و باقيلة كام شهر ولازم يخرج بشكل كريم و الرجل حكمنا 30 سنة و عيب نعمل معاه كدة ،،هتلاقي أخينا دة دماغة أنشف من قرص الطعمية البايت ويقعد يقول كلام في الغالب مش هتفهمه و لأننا مصريين فلازم نكون فاهمين كل حاجة و نوضح أننا فاهمينه كويس ونقعد نعيد أن الرجل دة أبونا و أمنا و كل الكلام اللي قلته قبل كدة
طيب
لية المؤيد مؤيد و المعارض معارض
ولية المؤيد ممكن بعد ما تاخد و تدي معاه في الكلام و تشرحله و توثق ليه كلامك تلاقيه على طول بقى تبع القلة المندسة وفي نفس الوقت تلاقي أغلب المعارضين من النوع اللي صعب إنك تقنعهم
المؤيدين هتلاقي منهم أنواع ....يعني
هتلاقي منهم المستفيد من النظام الحالي وبالنسبة ليه رحيل النظام هو كابوس لا يتمنى أنوا حتى يفكر فيه....يعني أية؟؟؟؟
يعني ناس مظبطة نفسها و عايمة على وش الفته وولادهم بيشتغلوا في أحسن أماكن و بمعارفهم و علاقاتهم ممكن يسلكوا في الحديد و الدنيا معاهم زيي الفل و الحياة بمبي ولو الحال أتعدل هما عارفين أن كل الامتيازات دي هتضيع منهم و ما أدارك أن تكون من تلك الفئة المحظوظة اللي لا بتفرق معاهم قوانين و لاحزام أمان ولا الكلام الفاضي دة
نوع تاني
هتلاقيهم الناس البسيطة اللي احتياجاتهم في الدنيا متواضعة و الستر عندهم أهم حاجة وماحدش بيموت م الجوع والناس تشيل بعض والكلام الجميل اللي كلنا عارفينه و الناس دول على فكرة أغلبية كبيرة جدا و في الغالب ما بيكونش ليهم في موضوع الكتب و القراية و الأخبار والأهرام و وجع القلب
نوع تالت "وعلى فكرة هو الموضوع مش واحد اتنين تلاته لأن التصنيف ممكن يكون أعقد من كدة لكن دول اللي في دماغي حاليا"
النوع التالت دة ليه مجموعة شعارات تكاد تكون موحدة بين أفراد تلك الفئة "قلبت فصحى"زيي
ليس في الإمكان أفضل مما كان،ماحدش بياخد أكتر من نصيبه ،كل واحد بيشوف اللي مكتوب له ولما النوع دة بيجي يتكلم في السياسة تلاقيه قلب على جلد الذات ،يعني تلاقيه يقولك ..أصل إحنا اللي ولاد كلب ،ماهو إحنا لو كويسين كان زمان حكومتنا هتكون كويسة ولكن لأننا وحشين فإحنا نستهل النظام الوسخ اللي بيحكمنا،،وكلام كتير على نفس الطريقة ،وبرده النوع دة من الناس في الغالب بيكون طبقة وسطى ،يعني الحالة المادية معقولة ويغلب عليه الطابع المحافظ في حياته وتفكيره و مفاهيمه و أغلب قرأته"لو ليه في الحوار"بتكون في الموضوعات العامة الغير محددة في مجال بعينه أو مجالات بعينها
وطبعا بالنسبة للمؤيدين في أنواع تانية غير الأنواع دي لكن زيي ما قولت أن دول اللي في دماغي دلوقتي
نيجي بقى عند الجماعة التانين الرخمين اللي مش هيرتاحوا غير أما يخربوها و يقعدو على تلها
ألا وهم أخوانا البعدا بتوع ميدان التحرير
من خلال متابعتي ليهم عن طريق وسائل الإعلام المختلفة زيي الجرايد و التلفزيون و المدونات و أخيرا الملك المتوج المسمى بالفيس بوك ,,أسعدني الحظ بالتعرف و التحاور مع الشباب دول
واللي فهمته منهم
أن هذا الرئيس لا يفي بوعوده
بداية من فترة حكمة اللي وعد أنه لن يترشح أكثر من مدتين وفي النهاية حكمة أستمر 30 سنة و إنه وعد بإلغاء قانون الطوارئ و أستمر هذا القانون الاستبدادي من بداية حكمه إلى يومنا هذا ،يعني بردة 30 سنة ،الوعد بالحفاظ على نزاهة الانتخابات و أيضا أستمر تزوير الانتخابات من بداية حكمه إلى يومنا الحالي واهتمامه بالفقير قبل الغنى وفي عهده أتمنى الفقير إنهم لو ماكانش اتولد كان حاله هيكون أحسن بكتير و الحرامية في عهده بقو أصحاب مال و أصحاب نفوذ و انضموا كمان للطبقة الحاكمة ،و أنه مش هيورث ابنه الحكم و كانت عجلة التوريث ماشية أسرع من العجل اللي ماشي ع الصحراوي يعني في النهاية كل فترة حكمة عبارة عن الوعود و الأكاذيب المتصلة ولو كان فاكر أن في عدالة في حكمة فهى موجودة بس في دماغه لكن على أرض الواقع تساوي صفر"زيي بتاع المونديال"
وإن كان الناس فاكرين أن الرئيس رمز فده سببه غياب الوعي السياسي عند الناس لأن العلاقة بين الحاكم و المحكوم هي علاقة مبنية على العدل أولا لكن كدبة أن مصر مبارك و الكلام الفاضي دة سببه أن المنافقين زرعوا في عقول الناس أن مصر هى مبارك ودة كلام مش صحيح لأن الرئيس مفروض أنوا موظف عند الشعب يخدمهم و يحل ليهم مشاكلهم و اللي حصل مع مبارك غير كدة خالص ،،،،لأن طول مدة حكمة مشاكلهم زادت وكرامتهم داخليا وخارجيا بقت في الأرض أو تحت الأرض بمسافة،وكان فين الأب المزعوم لما ولاده بيموتوا بالآلاف من الفقر و المرض و العبارة و القطارات ومراكب التهريب و إجرام الداخلية والمبيدات و القمح المسرطنين وإلتهاب الكبد اللي خدنا فيه المركز الاول على مستوى العالم"بلا فخر"
والشرعية اللي بيتحججوا بيها دلوقتي و دة أكتر نظام لم يحترم الشرعية و القانون،،أحكام نهائية بوقف تصدير الغاز للصهاينة ورفع الحد الأدنى للأجور والطعون على الانتخابات وغيرة و غيرة وكان النظام ودن من طين و وودن من عجين"مش يمكن عشان الريس سمعه تقيل!!"والشرعية اللي متمسك بيها دلوقتي ليه ما طبقهاش على نفسه قبل الشعب؟؟
والدستور الظالم اللي بيحكم بيه من أسواء الدساتير في العالم سلطات غير محدودة ومواد بتناقض بعض ولو هنتكلم عن شرعية الدستور فالمفروض أنه أول واحد يتقدم للمحاكمة طبقاً للدستورلأن المادة 184 من الدستور بتقول الشرطة هيئة مدنية نظامية ، رئيسها الأعلى رئيس الجمهورية ،وتؤدى الشرطة واجبها فى خدمة الشعب

يعني الشرطة اللي قتلت في 10 أيام ما يزيد عن 300 متظاهر سلمي هو رئيسها الأعلى و مفروض أنوا يكون أول واحد يتقدم للمحاكمة بتهمة القتل العمد
وإذا كان هو رمز من رموز أكتوبر زيي ما بيقولوا فالشعب هو اللي قدم شهداء أكتوبر و الشعب برده هو اللي قدم نصر اكتوبر مش حسني مبارك
الشعب في أي بلد محترمه هو اللي بيحكم مش النظام اللي بيتعامل مع الشعب كأنهم عبيد في العزبة اللي ورثها عن أهله
بيقولك في خطابه الأخير أنه لم يكن يوما يطلب سلٌطَة أو جاه ...يعني يا رجل بتحكم 30 سنة بالتزوير ومتبت في السلٌطَة بايديك وسنانك ،،،أمال لو كنت طالب سلٌطَة كنت هتعمل أية تاني ؟؟؟

نقلت لنا جميع الفضائيات الإخبارية تظاهرات يوم الغضب وشاهدنا هذا اليوم من بدايته ،لكننا جميعا لم نشاهد على الفضائيات كيف تم فض الإعتصام عن طريق الشرطة التي تعاملت مع المتظاهرين بمنتهى الحيادية و التزام الهدوء"مثلما يقال"
لو أردت مشاهدة فيديوهات فض التظاهرة تفضل بزيارة هذة القناة على اليوتيوب التي تضم تلك اللحظات الأخيرة
اضغط على الصورة للمشاهده